Almerischer
Aber stad, stad,
Daß di net draht!
Hats uns erst gestern draht,
Drahts uns heit a!
Buam stellts enk zsamm in Kroas,
I sog enk was i woaß.
Zündts enk a Pfeiferl an,
Wers rauka kann.
Des Tanzn is lustig,
Geht ois umadum,
Dahoam rennt die Maus
Mitn Göldbeidl um!
Für die Flöh gibts a Pulver,
Für die Schuah gibts a Wix,
Fürn Durscht gibts a Wossa,
Für d Bledheit gibts nix.
Jetzt hat er halt gsunga,
Jetzt hommas halt ghört,
Mia ham z' Haus a Stallkuah,
Die genau a so röhrt.
Wo is denn mei Dirndl,
Wo is denn mei Schatz?
Aufm Bergerl is obn,
Und a Almhüttn hats.
